أغاني المهاهاة والزغاريد

سابعاً: زغاريت أثناء زيانة العريس
1- حوّطْتَك بالله يا عريس جديد
يا ريت عمرك كل عام يزيد
حوّطْتَك بالله يا سنَد بيّك واخوتك
يا زينة العِرسان في ليالي العيد
———
2- شلّحْتك بدلة العزوبية لبّستك بدلة العُرْس
شمعة اسكندرانية تِظْوي على جميع القُدس
————
3- ريتُه ملبوس مبارك بالسبِع بركات
كما بارك المسيح على الخمس خُبزات
(أو) كما بارك محمد على جبل عرفات
————-
4- بيّ فلان يا جمَلنا يا لِبْسك حرير مهَنّى
ربّي يْطوّل عمرك وتْدير بالك إلنا
————-
5- أرقص لْطيف لْطيف يا بو قميص نظيف
يا عسل في قناني ونداوي فيك كل ضْعيف
6- بيّ فلان مين قدّك ومين ودّك
بُرج عالي ريت البين ما يهِدّك
تُدْرس عدوّك دريس الزيت عَ بدّك
عمرك على الله ماهوش على عبدك
———-
ثامنا: أغاني المهاهاة والزغاريت في العروس أثناء صمدتها وقُبيل طلعتها من بيت والدها:
1- والطول طول النخل والعُنُق مايل ميل
والخَصِر من رِقّتُه هدّ القِوى والحيل
يا نايمين الضحى واتنبّهوا في الليل
فلان صاد الغزالة اللي عليها العين
———-
2- إرفعي راسك يا مرفوعة الراسي
لا فيكِ عيبة ولا بِتْطَملي الراسي
إرْفَعي راسِِك لبيِّك وقوليلُه
احنا طاسات الذهب ومْعَرّمة بلولو
———
3- خيارة وفقّوسة طاسات منقوشة
هذه الفرْحة لَفلان عُقْبال إخْوة العروسة
———–
4- قومي اطلعي حلّ الرواح
والبُلبُل غنّى والديك صاح
باب دارِك صايغ واسمه صلاح
يِصْنع أساور لايديك الملاح
———
5- خُذوها يا الأمارة وانتو الغانمين
هذه بنت أبو فلان تِنْهدى عَ السلاطين
————-
6- الله معِك الله معك كُثر البُكا ما يِنْفعِك
وانْ كان في دار أبوك مسمار إخلعيه وخُذيه معك
—————
7- يا رَب سلّمْ بيْها يا ربْ كثّر مالُه
واطْلع جهاز الغالية عُقْبال العرايس في داره
————–
تاسعاً: زغاريت أمام الكنيسة قبل الإكليل وبعده:
1- باب الكنيسة عالي واشرْعُه بإيدي
خَلّوا قْليبي يِفْرح قَد ما بكَتْ عينيّ
————-

2- باب الكنيسة عالي واشرْعُه بالخَنْصر
خَلّوا قليبي يفرح قد ما بكى واتْحسّر
————–
3- ريتُه اكليل مْبارك بالسبع بركات
كما بارك المسيح عَ الخمِس خُبزات
————-
عاشراً: زغاريت المباركة بعد وصول العروس الى بيت العريس:
1- يِسْتاهل الرب راية واربع مشاعل بزيت
سيعة سعيدة يا ربّي اللي جاب العروس عَالبيت
—————
2- يِسْتاهل الرب راية وقراية الحمد فيها
سيعة سعيدة يا ربّي اللي تْجّوّز فلان فيها
—————
3- يِصْلح لبيّ فلان كل مال الدير
واربع طواحين تِطْحن نهار مع ليل
واربع عبيد يشِدّوا على ظهور الخيل
واربع كناين يقولن عمّي صباح الخير
———
4- حوّطْتَك بالله يا عريس جديد
يا ريت عُمْرك كل عام يْزيد
حوّطْتَك بالله يا سنَد بيّك واخوتك
يا زينة العِرْسان في ليالي العيد
———
5- والْحِمِد لله عِمْرِتْ دور أهالينا
يِتْمايل الفَرِح فيها كيف ما مالِ
يابو عباتين لا تِفرح بعَثْرتنا
يا رْجالنا سالمة والمالِ ميّال
———
أحدَ عشر: المهاهاة عند تقديم الطعام، والتَرحيب بالأصهار والضيوف

1- سِمْسم بْرِسمُه حلّ اليوم قِسمُه
الله يمَسيكوا بالخير كل واحد بِاسْمُه
———-
2- بيتنا دافي عيشنا وافي
تْفَضّلوا يا جماعة ريتُه صحّة وعَوافي
————
3- والرُّز ما هو عيش ولا هو طعام الجيش
واللي ما يْسوّي زي أبو فلان والاّ الفَشِر ليش
————–
4- فُتِتْ عالوادِ واثاري السبِع في الوادي
واثاري بيني وبين السبع ميعادي
بيّ فلان ويا مِطْعِم الزادِ
غَد المجالس يجيبوا سيرة اللي جادِ
———-
5- مرحبا يا عْزازي ميتين حَمْرا تْزازي
واللي ما تِفْرح بطَلّتكو تِنِكْسر كسر القزازِ
————
6- مرحبا ابْكو ثمانْميّة من الترحيب
عِزّ النسب ما يِِعْلى عليكو نسيب
وانتو الثُريّا وتالي النِجِم كلّه يغيب
———-
7- مرحبا با ضيوف اللي ضِفْتونا
واخْضرّتْ الدنيا وآنستونا
عُقْبال الفرِح لاولادكو
ونجيكوا يا احباب كما جيتونا
———
اثنا عشر: أغاني المهاهاة خلال العُرس، وهي في الغالب مُوجّهة للعروس
1- كُلكو يا سادة خرزة في قلادة
كل يوم نجَوِّز واحد ونْظَل في هالعادة
————-
2- وعدتنا يا قمر ليلة تيجي لينا
نُفرُش حرير ونظِّوي الشمِع فيدينا
ونُغْسِلَّك دارنا بدموع عينينا
والحِمِد لله هالفرحة لهالينا
——–
3- حوّطْتَك بالله وحدة والثانية ثِنْتين
والثالثة العَذرا مِريم تْرُد عنّك العين
(أو) والثالثة خرزة زرقا ترد عنّك العين
————-
4- معمول في الهوا حطّيتُه في الفرن ما استوى
وتْفرّجوا يا جماعة ماش كل العرايس سوا
————-
5- طبخنا مْلَقْلقة حرّكناها بالمعلقة
واللي تِتْهزّاعلى فلانة ريتها من جوزها مطلّقة
————-
6- سََلْ تين مْجَلّل بياسمين
عروستنا صغيرة ما طَبْقتش العِشرين
————
7- سل بندورة طالع من الجورة
قعِدْتك يا فلانة قَعْدة الغندورة
———–
8- سَلْ بيتنجان يا طالعة من البُستان
قعدتك يا فلانة قعدة السلطان
———-
9- فلانة يا وزّة تفاحة من غزّة
الله يخلّيلها أبوها وتظل في هالعِزّة
————
10- خَيْتي يا فلانة وانا لَشْهدلِك شهادة زور
واعمل لِك غدا من فخذة العصفور
وكان ما بِتْصدقوا يا حاضرين
هَيّوُ على ظهر الحيط منشور
———
11- خيتي يا فلانة كوني كما صيتك
كوني سموحة طووعة نعم لَرْجالِك
والله يا خيتي لن جادوا لَجود إلْهُم
ولن أُقدوا نارهم لَزيدها حَطَبْ
———-
12- وُكُتْبي لُه يا فلان ألف وُباء
تِتْهنّى في عروستك مدى الحياة
وُكُتْبي لُه على الحصيرة
تِتْهنِّي في دارك يا الأصيله
———
هذه المهاهاة والتي تليها تُقالان إذا كان والد العريس متوفياً:
13- أبو فلان ما مات ولا خلّف بنات
خلّف فلان واخِوْتُه عِزوَة للساحوريات
————–
14- طير يا طير يا اللي في السّما العالي
يا نِجْمة الصبح يا اللي مقابلة داري
إن كان أبو فلان غدا من حُكم الباري
يٍسْلَموا اولاده بدالُه يْعَمْروا الدارِ
————-
ثلاثة عشر: أغاني المهاهاة خلال العرس، وهي مدح وافتخار بالعريس وأقاربه:
1- دار أبو فلان من رُفِعْها تِسْمع طنين النحل من تِحِتْها
قالوا لي يا ناس أنو سكانها قُلت أبو فلان سخيّ الكف يِصلحِلْها
——————
2- دار أبو فلان ارماح رْماح ومْفرّشة للضيف لن أجا وراح
عِنْد الصُبح يِضْوي قنديلها سُكانها يا نِجْمة الصباح
——————

3- بَيْ فلان يا قفة المربّعة وبالذهب مْقبّعة
ربّي يْطَوّل عمرَك لما اتْجَوّز الأربعة
————-
4- بَيْ فلان يا نخلة في راس السوق
كِشتبان الذهب يا نِجْمة العيّوق
وانا قصّاد ربّ السما من فوق
يُنُصْرك نصرة قوِيّة ما يِعْلى عليك مخلوق
————-
5- اولاد عمّي مِيّة ما قُلْتها حُقْريّة
لَن مُتِت شالوا بْنَعْشي لَن عِشِتْ أنا المحظيّة
————
6- وامبارح العصر حمّلْنا وزَمّلنا
شطّ الشريعة وبيت ساحور منزلنا
مُرّي يا مليحة واسألي عنّا
كُل الأعادي مقهورة من فعايِلْنا
———
7-عيلة أبو فلان يا ميّة على ميّة
خلّوُا العقيلي على العينين مَرْخيّة
وامشوا في ناموس لا تِمْشوا في ذِلّيّة
———-
8- بَيّ فلان يا خيمتنا اولاده قاعدين فيها
فلان يا شمعتنا لا عاش مين يِطْفيها
————
9- شُفِتْ حمامة تِحِت لمونة
سيعة تْبَرْجِم وسيعة تُطْلب مونة
عَ جَنْب أبو فلان شباب مضمونة
اضرب بسيفك وخلّي اعداك مهزومة
———-
10- بَيْ فلان اقعد وعلِّ رِكبْتَك عود الريحان ما اقوى عِزِوْتك
اخْطُب وجوِّزْ في سنين الغلا وحُطْ الأعادي تِحِتْ إمِرْتك
11- أبو فلان واخِوْتُه لن التقوا أرْبعَتْهُم
لِبْسوا المْجوهر وارخوا بيض لِرْدانِ
سِعْدِك يا فلانة لن كانوا إلِكْ سَنَد
لا عُمرِك تِنْظامي ولا بْتِرْحلي من البلد
لِبسوا المجوهر: الملابس المذهبة
لِردان: من الرِدن وهو الكُم الواسع
———–
أربعة عشر: من أغاني المهاهاة..مدح وافتخار بالعروس وأهلها
1- ميلي على الجَنْبين يا كبيرة الجدّين
جدّك فلان الله يِرْحمه والثاني فلان يا خزاة العين
—————-
2- لا توخذ البنت الاّ من كانت أمها
والقمر أبوها وِلِهلال ابن عمها
لا حدا في الليل عيَّبْنا ولا حدا عابْنا
ولا حدا في نصّ الليل دقّ ابوابنا
———-
3- تِسْتاهلي يا بنت الصدى والندى
بنت ساس الحيط واعلاه البُنا
لن كان أبوك فلان يا نيّالِك
بِذْبح وبِقْري في سنين الغلا
———-
4- واحنا بناتك يابا كل أربعة في ديوان
والبيض منّا سراري والسُّمُر فينا غُزلان
————-
5- فلانة يا نعنعة وبالذهب مقنَّعة
ربِّي خلِّيلها عريسها وابوها واخوتها وتظل عليهم مْدلّعة
————–
6- هالحمولة يا اعمامي ويا اخوالي
وازرعوا عَ راس العين رمّان
حيّاكوا الله وحيّالي مظافتكو
والرجّال منكو يِسوى ميت رجّال
والعقل في الراس يِِسوى محكمة وقاضي
————
خمسة عشر: مدح وافتخار بالوجهاء وكبار البلد:
1- بِلُّه القرنفل بِلّه والزعفران كلّه
وان كان ابو فلان بينكو بكون الفرح على حِلُّه
————-
2- بيّ فلان يا ناس شو تقولوا فيه
كلّه ذهب يوسفي دقّة زغل ما فيه
ريت من راح للحاكم وقدّم فيه
يُعقُب كلامه وكل الناس تِشْعى فيه
————
ذهب يوسفي: نسبة الى رجل إقطاعي يُدعى يوسف، وكان يملك أموالاً طائلة من الذهب.
3- بيّ فلان يا زر المستكى وين ما مال ارتكى
خفيف على ظهر الفرس وثقيل على رْقاب الِعْدا
—————-
4- بيّ فلان مين قدّك ومين ودّك
بُرج عالي ريت البين ما يْهِدّك
تُدرُس عدوّك دريس الزيت عَ بدّك
عُمرك على الله ماهوش على عبدَك
———
5- بيّ فلان يا ثوب القناديل
اللي كلامك مْرتّبْ في الدواوين
دامت لي عينك يا عزيزي
يا خيّي ويا سبع الرجاجيل
——–
6- بيّ فلان يا كبير الجدّين ياسمين مفَتِّح في شهر كوانين
يوم تحمل الخيزرانة وتقولها ميلي تفرح لك فلسطين عَ الأربع جوانيب
——————–
7- الله يمسيكوا بالخير يا اللي قاعدين على الصّفين
وكان ابو فلان معاكو بعون الله ما يطولكوا ضيم
—————
8- دار ابو فلان رُكّي عالْعِدا رُكّي
رابوص يا قلعة الصوّان ما أثقَلْكِ
وان كان يا بو فلان كلامك ما يُمْرقش
تِخْرب حارتهم واحنا ما بنرحلش
———-
9- زرعت في كفة ايدي قرنفلة خضرة
وانت يا بيّ فلان يا ناقل الذخرة
وارتجّت منّك الشام حتى الشام هي لُخرى
وارتجت منك الشام وارتجّت علاليها
وارتجت البيض في جُوّا مخابيها
حتى السلاطين من هيبتك زالت عن كراسيها
10- وامبارح العصر حطينا على المينا
غابت الشمس لا رُحنا ولا جينا
بيّ فلان قوم اركب ولاقينا
واضرب بسيفك لا تْشمّت حدا فينا
———–
11- شُفِتْ بيّ فلان وصندوق التِتِن في ايده
كَرِمْ حامل ومْدَلّي عناقيده
وانا قصّاد ربّ السّما من نِعمْتُه يزيده
ويصير سلطان وكل الناس بِتْريده
12- من راد السِّعد يلحق صاحبه
ومن راد فلان عَ الطريق يرافقه
ومن راد القمح والزيت في سنين الغلا
أبو فلان ما تِخْلى منازله
13- هالحمولة يا نُوّار الشجر ناقلين المال من تحت الحجر
حوّطتكوا بالله أنو كبيركو كبيرنا ابو فلان عَالحاكم حضَر
——————–
14- كُلْكو يا جالسين يا زهر البساتين
بينكو ابو فلان مْزرِّر الجوخة عَ القُمصان
وانتو يا الأمارة وهو بينكو سلطان
—————
15- بَيْ فلان يا سيعتك اوقية خاتم الذهب في خنصرك غيّة
ربّي يطوّل عمرك وتْظَل تمشي مع لِكْبريّة
—————
16- بيّ فلان أدام الله بقاك شو قالّك الحاكم يومنّه لقاك
أنعم عليك وزادك وأعطاك حُكم بلادك
—————-
17- والشيخة ماهي بقول مشايخ ولا هي بجرِّ الشالات
والشيخة ما بتصلح الاّ لأبو فلان عشانُه مْعدّل المايلات
—————-
18- يا حارث الأرض قُدّها يا راكب الخيل رُدّها
والكَبرة ما تصلح الاّ لأبو فلان عشان كار أبوها وجدّها
——————-

أغراض أخرى تقال فيها المهاهاة والزغاريت وهي:
1- ما يتعلق بالغيّاب والمسافرين والأسرى،وعودتهم الى ديارهم وبيوتهم.
2- النجاح ونيل الشهادات العلمية.
3- ولادة الصبيان.
4- عقد البيوت.
5- الصلح بين المتخاصمين.
6- المناسبات الوطنية.
أولا: ما يتعلق بالغيّاب والمسافرين والأسرى.
خلال العرس، اذا كان أحد أقارب العريس مغترباً أو مسافراً، فتقول النساء المهاهاة التالية له:
1- والرز في الهنايب والسمن حُوله ذايب
شوباش لابو فلان عَنّه في السفر غايب
—————
2- إرسال السلام للغائب او المسافر من خلال المهاهاة التالية:
بنيت عِلِّيْتي وعَلّيت عاليها
عِدّوا نجوم السما وعِدّوا طواقيها
يا رايحين على عمّان سلّمولي عَ اهاليها
واكثر سلامي لَفلان هااللي ساكن فيها
————
3- وتهاهي النساء المهاهاة التالية اذا كان المسافر عائداً الى بيته:
يستاهل الرب راية واربع مشاعل بزيت
سيعة سعيدة يا ربّي اللي روّح فلان عالبيت
————–
4- في بعض الأحيان تُستعمل المهاهاة لأكثر من غرض واحد.
لو أخذنا مثلاً المهاهاة التالية:
طارت الحمامة هدّتْ عَ لِقْيامة
والحِمِد لله يا ربّي اللي روّح فلان بالسلامة
—————
ويُمكن ان نستعمل الشطر الأخير لعِدّة أغراض، فنقول:
اللي نجح فلان بالسلامة، أو
اللي تْجوّز فلان بالسلامة، أو
اللي عقد ابو فلان بالسلامة.
——–
5- وارفعي راسك يا قمر يِِسْلَم بيّك واخوتك يا قمر
والحاضرين بِسدّوا والغايبين أقوى نظر
—————
6- مرحبا أجونا الِعْزازي
وانتو اعزازِي وجيتوا من عند الِعْزاز
ضِحْكت الكو طيورالسما حتى طيور الباز
وانت يا فلان أغلى من الذهب لن كان صاحبه مِعْتازِ
————–
7- أبانا الذي في السموات وانا لضَوّي سبع شمعات
والعذرا النقيَّة تْرُد جميع الغُربية
—————
8- المهاهاة التالية تُقال بعد عودة الغيّاب:
تستاهلي يا دارنا حِنّة واحنِّي ابوابك
سيعة سعيدة يا ربّي اللي لَفُوا عليك اصحابك
—————
9- عن الغُربة أيضاً:
بتقول فلانة بلاد الغُربة ذلّتْني
يا كلمة العَدوّة شالتني وحطَّتْني
نِذْرٍ علي لو جيت يا خويا ديرتنا
لَذْبَح ذبايح واقول اليوم فرحتنا
———-
ثانيا: المهاهاة في النجاح ونيل الشهادات العلمية.
1- لِثْنين سلَّم الله لثْنين فلان على حاجبي وفلان على عيني
نِذْرٍ عليّ لن جابوا الشهايد هالاثْنين لقيم للدارِ طبلينِ وزَمْرينِ
——————
2- فرّشوا حصايِرْهم وتعاهدوا بايديهم
قالوا فلان بِنْجحِش نجح وقلّع عينيهم
————-
ويمكن استعمال هذه المهاهاة في أغراض أخرى، باستبدال كلمة بِنْجحش بكلمة بِروّحش أو بِتْجوّزِش..الخ
3- إلي اتناعشر سنة واتناعْشرعام
إلي اتناعشر سنة بَعِدّ في الأيام
إلي اتناعشر سنة مربوط في القلعة
نِذرٍ عليّ لن نجح فلان هالجمعة
وانا لأذبح ذبايح واقدّم للخضر شمعة
4- وانا قعَدت تِحِت مِزراب الذهب
نِسْتحمد الله نال قلبي ما طلَب
روحوا خبّروا اعْدايا
فلان جاب الشهايد ونِلْت أنا مُنايا
———
ثالثاً: ولادة الصبيان
1- طار النّدى طار هدّا على الحيطان
والحِمِد لله يا الله أجا لَفْلان الصبيان
———–
2- بيّ فلان يا لولو ملاة ايدي
مِطْعم الزاد يا خُلْفة لَجاويدي
نِذْرٍعليّ لن أجاك الصبيان يا سيدي
لقول بيتين والثالث تراويدي
———
3- يِِستاهل الرب راية وقراية الحَمد فيها
سيعة سعيدة يا ربّي اللي أجانا الصبيان فيها
————-
وهذه المهاهاة بالذات تُقال في جميع المناسبات، خطبة أو زواج أو نجاح أوعقد، وذلك بتغيير الشطرة الأخيرة، فتصبح: اللي خطب فلان فيها…وهكذا…الخ
4- أبو فلان ما هو بشطارتك ولا بغزل اوْقيتَك
يا اللا ربّي أعطاك حسَب طيبة نيّتَك
———-
أي أن الله أعطاك دون ان تعمل وتجني النقود، وتُقال هذه المهاهاة في عدّة مناسبات. والمقصود بغزل اوقيتك أي غزل الصوف على النول.
رابعاً: عقد البيوت
في مجتمعنا العربي الشرقي اهتمام خاص في بناء البيوت، لأنّ البيت هو المكان الآمن الذي يحتمي به الإنسان.
ولذلك كانوا يبنون بيوتهم متلاصقة، ليحتموا بِبَعضهم اذا تعرّض أحدهم لمحاولة اعتداء على حرمة بيته.
ولذلك كانوا يفرحون لبناء البيت- الذي يتكوّن في العادة من غرفة أو غرفتين- أكثر من العرس أو ولادة الصبيان.
وكانوا يتعاونون مع بعضهم، في بناء البيت وخصوصاً في يوم عقد البناء.
وكانوا يُخرجون أنواعاً من الأكل المتوفّر في بيوتهم لإطعام العاملين في العقد، وأحياناً يقوم صاحب البيت- إذا كان مقتدراً- بطبخ ذبيحة لإطعام العمّال وبعض الأقارب والجيران، الذين يشتغلون عونة مع صاحب البيت.
وبهذه المناسبة تُطلق النساء المهاهات التالية:
1- والعُرس ما هو فرحة ولا جياب الصبيان
ما في فرحة غير العقود ولِعْب الولد عَ ظهور الحيطان
—————-
2- يستاهل الرب راية وقراية الحمِد فيها
سيعة سعيدة يا ربّي اللي عقدنا الدار فيها
————–
3- بيّ فلان يا لولو ملاة ايدي
مِطْعِم الزاد يا خُلْفة لَجاويدي
نِذْرٍ عليّ لن عقدت دارك يا سيدي
لقول بيتين والثالث تراويدي
———
4- ريته عقد مبارك بالسبع بركات
كما بارك المسيح عَ الخمس خُبزات
أو كما بارك محمد عَ جبل عرفات
————
5- بيّ فلان اقعد وعلّي رِكِبْتك
عود الريحان ما اقوى عِزِوْتك
ابْنِِ وعلّ في سنين الغَلا
وحُط الأعادي تِحِتْ إمِرْتك
خامساً: الصلح بين المتخاصمين
إذا تصادف وجود فرح في مناسبة ماعند أحد الناس، وكان هناك خصام بين صاحب الفرح وأحد أقاربه، فيسعى رجال الإصلاح لإنهاء الخصام، حتى يكون الفرح على أتمّه.
وبهذه المناسبة تُطلق النساء المهاهات التالية:
1- الحِمِد لله يا الله زَلِن الهموم إنشاالله
والميّة عَ مجراها والنصرة من عند الله
—————
2- وعدتنا يا قمر ليلة تيجي لينا
نْفرِّش حرير ونظوِّي الشمع بايدينا
ونُغْسِلّك دارنا بدموع عينينا
والحِمِد لله هالصلحة لَهالينا
———
3- الحِمِد لله صبر قلبي ولا قصّر
وانحَل حبل الجفا من بعد ما تْعسّر
سبحان من خلّى نجوم الليل تِتْفسّر
وانا فرحانة عَ هذا اليوم بَتْحسّر
———
4- والشيخة ما هي بقول مشايخ
ولا هي بْجَرّ الشالات
والشيخة ما بتِصْلح الاّ لأبو فلان
عشانه مْعَدِّل المايلات
———
سادساً: المهاهاة في المناسبات الوطنية
أكثر ما كانت النساء تهاهي في المرحوم أبوعمّار بصفته القائد والرمز لنضال الشعب الفلسطيني. فلا تمر مناسبة وطنية دون ان تتغنى به النساء، وتُطلق الزغاريد، هاتفاتٍ باسمه. ولا تزال هذه الأغاني تتردّد في مناسباتنا الوطنية حتى اليوم. وإليكم بعض هذه المهاهات:
1- شُفِت أبو عمّار وعلَم فلسطين في ايده
كَرِمْ حامل ومْدَلّى عناقيده
قَصّاد ربِّ السما من نِعِمتُه تزيدُه
ويظل رئيس ودولة فلسطين تِحِت ايده
———–

2- في باب داري بير مْغَطّى في شنبر حرير
حلَفِتْ ما بفتحُه الاّ بتحرير فلسطين
—————
3- شُفِت حمامة تِحِت لمونة
سيعة تْبَرجم وسيعة تُطْلب مونة
عَ جَنْب أبو عمّار شباب مضمونة
اضرِبْ بسيفك وخلِّي عْداك مهزومة
————-
4- فلسطين يا خيمتنا شبابْنا صامدين فيها
والوحدة الوطنية شمعتها لا عاش مين يطفيها
—————
5- مشتاقة أرفع علمي وافرح فيه
زينة شباب فلسطين بالروح تِفديه
كلهم نخوة وحميّة وكلهم إخلاص
للدولة الفلسطينية كلنا بنفديه
———-
6- شباب فلسطين يا مِيّة على مِيّة
شباب بيت ساحور أسود قويّة
وانتو ما بهمكوا السجن ولا الإقامة الجبرية
وانتو ما بدكوا الاّ الدولة والحرية
————-
7- شباب فلسطين يا رب سلِّمكوا
لابسين الخواتم في خناصركو
قصّاد ربّ السما والعرش يُنْصركوا
نصرة قويّة تُجْبر لي خواطِرْكو
———–
8- شبابنا روّدت بناتنا غنَّت بيارق الحُمُر من روس الشّفا طلَّت
ريت من شافت الشباب وما صلّتْ تِبْلى بكاس العمى بعد العمى ذلّتْ

9- وامبارح العصر حمّلْنا وزمّلْنا شطّ الشريعة وفلسطين منزلنا
مُرِّي يا مليحة واسألي عنّا كل الأعادي مقهورة من فعايلنا
——————-
10- دولة فلسطين يا قلعة حديدية
طِلْعوا عليها اعْداها من الألفين للميّة
طِلْعوا عليها اعداها تَيْهدّوها
خِسوُا النذايل ولا داسوها